ვებ-გვერდი მუშაობს სატესტო რეჟიმში

+ A -
A A A
a A

სასამართლო გადაწყვეტილებები

25 თებერვალი, 2020

ტეგები

განაჩენი , მკვლელობა

სასამართლომ ხორავას ქუჩაზე მომხდარი მკვლელობის საქმეზე გამამტყუნებელი განაჩენი დაადგინა

2020 წლის 25 თებერვალს, თბილისის საქალაქო სასამართლომ დაასრულა სისხლის სამართლის საქმის არსებითად განხილვა ჯგუფურად ჩადენილი, დამნაშავისათვის  წინასწარი შეცნობით არასრულწლოვანის განზრახ მკვლელობის ბრალდების საქმეზე, ბრალდებულ მ. კ.-ს მიმართ.

სასამართლომ   მ. კ. დამნაშავედ ცნო დ. ს.-ს  ჯგუფურად ჩადენილ განზრახ მკვლელობაში და მას სასჯელის სახედ და ზომად 15 წლით თავისუფლების აღკვეთა  განუსაზღვრა. საქართველოს კანონის არასრულწლოვანთა მართლმსაჯულების კოდექსის გამოყენებით, ბრალდებულს დანიშნული თავისუფლების აღკვეთის ვადა შეუმცირდა  1/4-ით და საბოლოოდ, სასჯელის სახედ და ზომად განესაზღვა თავისუფლების აღკვეთა 11  წლის და 3  თვის ვადით.

საქმის არსებითად განხილვისას  ბრალდებულმა თავი არ ცნო დამნაშავედ წარდგენილ ბრალდებაში, თუმცა სასამართლო სხდომებზე გამოკვლეული მტკიცებულებებით, კერძოდ: მოწმეთა ჩვენებებით, სასამართლო-სამედიცინო და ბიოლოგიური ექსპერტიზის დასკვნებით და  საქმეში არსებული სხვა მტკიცებულებების ერთობლიობით, სასამართლომ დადასტურებულად მიიჩნია მ. კ.-ს  მიერ ბრალად შერაცხული დანაშაულის  ჩადენა. კერძოდ, 2017 წლის 1 დეკემბერს ფიზიკური დაპირისპირებისას მ. კ.-მ სხვა პირთან ერთად წინასწარი შეცნობით, თანნაქონი ბასრი საგნის გამოყენებით,  მოკვლის განზრახვით სხეულის სხვადასხვა ადგილზე ჭრილობები მიაყენა არასრულწლოვან დ. ს.-ს, რომელიც მიყენებული ჭრილობების შედეგად გარდაიცვალა.

განაჩენი შეიძლება გასაჩივრდეს გამოცხადებიდან 1  თვის ვადაში, თბილისის სააპელაციო სასამართლოს სისხლის სამართლის საქმეთა პალატაში თბილისის საქალაქო სასამართლოს სისხლის სამართლის საქმეთა საგამოძიებო, წინასასამართლო სხდომისა და არსებითი განხილვის კოლეგიის მეშვეობით.